香港地好多人的屋企都好亂，但一個懶字，不想自己動手執屋煮飯，惟有找外援代勞。在英國讀法律，又曾在美國工作的九十後Daniel，深深體會一個人住的地方會好亂，想搵人執屋。回港後，他選擇不投身沉悶的法律界，反而想搞點創意，創辦一個方便懶人的App，幫港人搵鐘點執屋清潔煮飯，每月生意額達100萬元。

要執屋清潔，當然要靠鐘點姐姐。Daniel最初在社區中心搵幫手，她們均曾在職業訓練局再培訓，大多是要湊小朋友的中年婦女，在小朋友返放學之間時間，接工作搵外快。這做法令平台可找到專業執屋，也可協助中年婦女重投勞動市場。

「我哋個App簡單一點，（按所屬地區和工作時間）一早幫個客揀定鐘點姐姐，但其他平台就好似招聘Post一份工咁，會有十幾個人打來話想做，但我哋只會有一個鐘點（接單）打俾個客。」

至於服務方面，由最初只接鐘點執屋，發展到現時上門按摩、維修、寵物、洗衣、託管及長者照顧鐘點服務都有，登記用戶達2萬，當中7成為熟客，定期每隔一周或兩周請人執屋；另又替不少短租單位清潔，每月也接數百張這類單。

這位創辦人深信，未來最搵錢是「服務」，目前正向送禮服務概念進發，如幫沒有時間的人購買禮物、收藏禮物，令收禮物的人帶來驚喜。

https://topick.hket.com/article/1766212/90後創懶人App請鐘點工%20%20%20%20每月生意額百萬